|
GÍ-SÛ
bâ-á
|
語詞
猫仔
⭕
ⒸⓉ
親成漢字
貓Ｘ猫Ｘ |
|
動物「bâ-」只个詞素歌仔冊差不多專寫做「猫」。《台日》寫「猫」。「貓、猫」在漢文是仝字各形、是「bâ」个親成漢字。請看「niau」。拱樂社个戱文有寫『老麻』（lāu-bâ、母之罪）。
「Bâ-á」也有酒家女个意思。《白話典》注講只个詞个詞源是動物彼个「bâ-á」甲英語「BAR-GIRL」、双港詞源。「Bâ」那用塊罵女性譬相女性个時、《中教部閩南典》共伊寫做『媌』。《雅俗通》嗎是按呢寫、不閣台文咁八正實按呢寫、愛閣斟酌。
|
相關个詞
niau (生物)
iá-bâ
相關个字
貓、猫
|
|
GÍ-SÛ
*pòaⁿ-im-iûⁿ
pòaⁿ-iam-iûⁿ pòaⁿ-lâm-iûⁿ *pòaⁿ-lâm-niû- |
語詞
半南洋
ⒸⓀⓀ
半男娘
Ⓒ㊟㊟
半陰陽
⭕
ⒸⒸⒸ
～隂～ ⭕
半男陽
⭕
Ⓒ㊟Ⓒ
親成漢字
半㊟ |
|
《台日》收「pòaⁿ-iam-iûⁿ」「pòaⁿ-im-iûⁿ」、寫做『半陰陽』。閣有「pòaⁿ-lâm-iûⁿ」、寫做『半男陽』。《英厦》（214）「pòaⁿ-iam-iûⁿ」漢字寫做『半陰陽』。EMBREE 無收。歌仔册有寫『半陰陽』『半奄羊』『半俺～』『半庵～』『半嬲～』、用例少少仔。「Pòaⁿ-lâm-iûⁿ」照講是双原詞、一港詞原「pòaⁿ-iam-iûⁿ」、一港詞原「lâm-」（男）。看起來「pòaⁿ-lâm-niû-á」又閣攪第三港詞原「-niû」（娘）落去、不知咁有受着日語『男の娘』（おとこのこ）甲中國語『娘』（NIÁNG）『娘炮』（NIÁNGPÀO）等等个影响。現此時網路加減有人寫『半南洋仔』『半男娘仔』『半男洋仔』『半男羊仔』云云。
|
建議
pòaⁿ-iam-iûⁿ ⇄ 半陰陽、半隂陽
pòaⁿ-lâm-iûⁿ ⇄ 半男陽
相關个詞
iam (剦、閹)
|
|
GÍ-SÛ
kiáu-ká
|
語詞
攪絞
⭕
ⒸⒸ
親成漢字
攪絞 |
|
大概是双詞原、「*kiau-ká」去濫着「kiáu-jiáu」彼个 kiáu-。《台日》收「kiau-ká」、寫做『混絞』。「*Kiáu-ká」無收。《厦英》嗎是收「kiau-ká」無收「*kiáu-」。歌仔册有寫『嬌絞』ⒸⓀ『～假』Ⓚ。拱樂社个戱文有寫『嬌咬』ⓀⓀ。EMBREE 收「kiáu-ká」無收「*kiau-」。請看「kiáu-jiáu」甲「ká」。
|
相關个詞
kiáu-jiáu
ká (絞)
相關个字
攪
|
|
GÍ-SÛ
oân-kong-mn̂g
*oân-kiong-mn̂g *oan-kiong-mn̂g oan-kong-mn̂g |
語詞
員光門
⭕
㊟ⓀⒸ
圓光門
㊟ⓀⒸ
彎光門
⭕
ⒸⓀⒸ
灣光門
⭕
親成漢字
㊟門 |
|
《英厦》（20）有寫『圓公』（"oan-kong"）『圓公門』（"oân-kong-mn̂g"）『圓公頭』。《台日》有寫『圓宮』（oân-kiong）甲『圓光仔』（oân-）『圓光楣』『圓光門』甲『彎光仔』（oan-）『彎光楣』『彎光門』。歌仔册有一半本仔寫『員公』『圓公榻』（*oân-kong thoah）。現此時網路有人寫『員光門』『圓光～』『彎光～』『灣弓～』云云。『彎弓～』『圓弓～』凡世不是在來字。治者「弓」字是借音字、不閣無人寫『*員弓～』『*丸弓～』、通知寫『彎弓～』『圓弓～』个人嗎不是塊借音。論羅字書寫、EMBREE 有收『oan-kong-mn̂g』甲『oân-kong-mn̂g』、閣有「oân-mn̂g」（"ARCHWAY"）。《甘》有寫『oan-kong-mn̂g』『oân-kong-mn̂g』。夭《增補厦英》（163）有收「oân-kiong、oân-kong」『THE ARCHED TOP OF A DOORWAY』。今台灣客語有講『KIÚNG-MÙN』。唐山《客英》有收「VÂN-KIÚNG」『ARCH』、四角字寫做『[彎] 拱』。《客法》有收「VÂN-KIÛNG」『COURBER UN ARC, BANDER L'ARC』、寫做『彎弓』。中華語嗎有講『拱门』（～門、GǑNGMÉN）。通知「*oan-kiong-」「oân-kiong-」是原体・「oan-kong-」「oân-kong-」是語流變体、夭「oân-kiong-」照講双詞原、一港「*oan-kiong-」、一港「oân-mn̂g-á」彼个 oân-、亞是「oân-niá」彼个 oân-、亞是「oân-bûn」（轅門）彼个 oân-。請看「拱」（字）甲「oan」。
「拱」字（甲 "共" 字）打算是「-*kiong、-kong」个親成漢字。《集韻》有收「珙、拱」（居容切）『大璧也春秋傳與我其拱璧徐邈讀』。「拱」字《集韻》夭有三讀、古勇切・居用切・渠竹切。杜建坊・許嘉勇・潘科元朗寫『圓拱』。但是台文「拱」字在來專讀 kióng。
|
建議
oan-kong- ⇄ 彎光～、灣光～
oân-kong- ⇄ 員光～
相關个詞
oan ("ji̍p káng sûi ~")
îⁿ (圓、員) Tâi-oân
相關个字
圓
員 轅 彎、弯 灣、湾 公 光 拱 栱 弓 |
|
GÍ-SÛ
kian tàng
*kiân tàng |
語詞
堅凍
⭕
ⓀⒸ
親成漢字
Ｘ凍 |
|
《台日》「kiân tàng」寫做『凝凍』、夭「*kian-tàng」無收。請看「kian」。禮樂《清心歌》（1932）有寫『堅凍』。今「hoah chúi ē kian tàng」有寫做『喊水會結凍』『喊水會堅凍』『喝水會堅凍』『化水會堅凍』。莊名豪〈疼阮一世人〉（江志美流行歌）寫『化水會堅凍』。無論用治台文語境亞是揷治中文語境、『喝水～』甲『化水～』只二式本身是台文。「Kian tàng」寫做『堅凍』有基礎、不閣只字『堅』是借音字。那塊寫漢羅、「kian-」介適合寫做羅字。
主流台語講「kian tàng」。現代鹿港語丸那講「kian tàng」、不閣台北个山內夭有人講「kiân tàng」个欵（許嘉勇先生、私脚下請教）。「Kian」甲「kiân」原底無仝詞、不是腔口差。台灣海峽語原底講「*kiân tàng」、無講「*kian tàng」。路尾台灣話「*kiân」大体去乎「kian」食去、即産生「kian tàng」。請看「kian」。
|
建議
kian tàng ⇄ 堅凍
相關个詞
kian (堅)
|
|
GÍ-SÛ
kam-á-bi̍t
|
語詞
柑仔蜜
⭕
甘仔蜜
⭕
親成漢字
㊟ |
|
有二項植物号做「kam-á-bi̍t」。一个是「tho͘-má-to͘h」。一个是藥材、四常含檳榔𩛩做伙哺。《台日》所收个「kam-á-bi̍t」是第二項、寫做「柑仔蜜」。現此時加減有人寫『甘～』。
藥材「kam-á-bi̍t」省詞源、咱不知。那「tho͘-má-to͘h」个只个「kam-á-bi̍t」、「kam-á-」詞源是馬尼拉語（TAGALOG）「KAMATIS」。「KAMATIS」詞源西班牙語「TOMATE」。西班牙語「TOMATE」詞源中米州（墨西哥）先住民語「TOMATL」。西班牙語「T-」那會借做呂宋語「K-」、不知。只層音變照講發生治港都馬尼拉、幾那百冬前。西太平洋西班牙植民地 GUÅHAN（グアム島、GUAM）本土个 CHAMORU 語講『TUMATES』、西班牙語借詞。請參考 AUSTRONESIAN COMPARATIVE DICTIONARY。TAGALOG 語个厝邊仔語邦邦牙語（KAPAMPANGAN）講「TAMÁTIS」、不閣怡羅戈語講「KAMATIS」、啞宿務語「KAMÁTIS」「TAMÁTIS」朗有講。請參考 PALOMA ALBA〈HISPANIC WORDS OF INDOAMERICAN ORIGIN IN THE PHILIPPINES〉亞是張迎雪・項夢冰〈汉语方言里的西红柿〉。
「KAMATIS」借入來台灣海峽語、現此時唐山泉州語甲菲律賓福建語有講「kam-á-tit」（柑仔得、曹銘宗・台灣生活史：味素與柑仔蜜）。菲律賓福建語「kam-á-tit」「kam-á-bi̍t」朗有講（論壇私下請教）。金門語有講「kam-á-te」。澎湖媽宮有講「kam-á-bi̍t」甲「hó͘-chéⁿ-bi̍t」、通知「kam-á-bi̍t」尾節照講是在來詞素、含外來音「kam-á-」鬥做陣。亞是「kam-á-tit」乎人听做「kam-á-bi̍t」、路尾新个音代替舊个。
|
|
GÍ-SÛ
chhiū-leng-thn̂g
|
語詞
樹乳糖
⭕
ⒸⒽⒸ
親成漢字
樹Ｘ糖 |
|
只个語詞是黨國時代産生个。EMBREE 無收。英語講『CHEWING GUM』。無的確「chhiū-leng-thn̂g」頭二節有双詞原、在來詞「chhiū-leng」兼英語『CHEWING』。
日語講『チューインガム』『ガム』。客語『*SHŮ-NEN-THÒNG』打算是共台語揷借（CALQUE）个。
|
相關个詞
chhiū-leng...
|
|
GÍ-SÛ
thoân-pò
thoân-pò͘ |
語詞
傳播
⭕
Ⓒ㊟
親成漢字
傳㊟ |
|
《厦英》（379）有收「thoân-pò͘」『TO PROCLAIM, AS DOCTRINE』、注『R.』（～文語？） 、含「pò͘ chhân」收鬥陣（～傳播）。《台日》有收「thoân-pò͘」『傳播。傳はりひろがる』、寫做『傳播』、注「文」。閣有「thoân-pò」『傳へ報する』、寫做『傳報』、注「文」。全羅《教會報》有 210 篇寫「thoân-pò」、自一八九一年、內底清・日時代占 133 篇。有 49 篇寫「thoân-pò͘」、自一八九二年、清・日時代占 20 篇。《甘》pò͘「播」字後尾寫「thoân-pò」、pò「播」字後尾寫「thoân-pò͘」。EMBREE 收「thoân-pò͘」「thoân-pò͘-sek」、無收「thoân-pò」。看起來「thoân-pò」主要按漢文『傳播』來、夭「thoân-pò͘」減彩有『傳布』（～佈）个因素。雖然「播」字泉音 pò͘、不閣治近代來講（～下門漢文音産生以後）、泉音對下門音甲主流台灣音个影响一般眞有限。「Thoân-pò͘」寫做『傳播』、後字凡世通講是一種訓用字。
韓語有講『전파』（傳播）。日語有講『伝播』（でんぱ、でんぱん）。中國語有講『传播』（傳～、CHUÁNBŌ）、漢典注解『[TRANSMIT]』『传送或散布』『传染』『[DISSEMINATE]：广泛散布』『[BROADCAST]：使普遍知道』。嗎有講『传布』（傳布・傳佈、CHUÁNBÙ、漢典：[DISSEMINATE; SPREAD] 传扬；散布）。
LOBSCHEID（651）『DISSEMINATE』後尾有收「傳布」。『DISSEMINATED』後尾有收「傳播」。照此含《教會報》个記錄來看、「thoân-pò、thoân-pò͘」無影是日語借詞。
|
相關个詞
kóng-pò, kóng-pò͘
pò͘ chhân pò͘-si
相關个字
布、佈
播 |
|
GÍ-SÛ
sūn-sòa
sēng-sòa sīn-sòa |
語詞
順煞
成煞
ⓀⓀ
神煞
ⓀⓀ
順續
⭕
乘續
⭕
㊟Ⓗ
親成漢字
㊟Ｘ |
|
《台日》「sūn-sòa」「sīn-sòa」寫做『順續』、「sēng-sòa」寫做『乘續』。《台日新》「sūn-sòa」寫做『順續』、「sēng-sòa」「sīn-sòa」寫做『乘續』。《厦英》記「sūn-sòa」「sēng-sòa」（419）「sêng-sòa」（453）。《白話典》記「sīn-sòa」「sūn-」。泉底台語講「sīn-sòa」（許嘉勇・歌仔冊最新十二碗菜歌的語言分析）。照講「乘」字是「sēng-」个親成漢字、夭「sēng-sòa」是原体、路尾前節彼个 -ng 去乎後節个 s- 同化做 -n、産生「sīn-sòa」（音）。路尾「sīn-sòa」閣生「sūn-sòa」、凡世是甲單詞「sūn」（順）鬥陣生个。台灣客語有講『 SHŮN-SA-*É』、仝意思、不閣唐山《客英》《客法》朗無收、通知眞有可能是店台灣亞是漳州共台語・漳語借个、而且是對「sūn-sòa」・將「sūn-」凖做「順」來轉个。
潮州語無講『*SẼNG-SÒA』『*SŨN-SÒA』个欵。《英汕》（15）有收『SÊNG KI-HÕE』、意思相關。FIELDE（71）收『SẼNG KI-HÕE』云云。《中華漢方典》『乘』下底有收一條『乘勢』、長沙語有、下門有（sēng-sè）、龍岩有、汕頭有。閣有興化語『乘縫』『乘風』。者个詞朗甲「sūn-sòa」倚意。《台日》有收「sēng-sè、sīn-sè」（乘勢）。
歌仔册寫『順煞』上多、閣來『成煞』。有幾落本寫『神煞』『辰煞』ⓀⓀ『順續』『承續』ⓀⒽ。黃塗《新編五才子歌》有寫『乘續』。拱樂社个戱文有寫『神煞』（杜諒梅）。現代流行歌詞有寫『順續』『～煞』。潘科元〈文無足額表音〉有寫『乘紲』、標音「sēng-sòa」。
傳統台羅字寫「sūn-sòa」（教會報、DADWT、甘 643）。全羅《教會報》有 1 篇寫「sīn-sòa」、「*sēng-sòa」「*sêng-sòa」不八寫。EMBREE 收「sūn-sòa」「sēng-sòa」。雖然「sīn-sòa」（音）照講是「sēng-sòa」个變体、不閣只个變体現此時成普遍、顚倒原体「sēng-sòa」恰罕得听着。
「Sēng-sòa」「sīn-sòa」原体・變体个關係對台文大衆嗎無介好了解、夭現代羅字台文有眞多人寫『sīn-sòa』。
|
建議
sūn-sòa ⇄ 順續
sīn-sòa ⇄ 乘續
相關个詞
sēng ("~ ti giâ chàu")
siūⁿ-poe sòa (續) pin-nn̂g
相關个字
乘 (sêng)
乘 (sēng) |
|
GÍ-SÛ
thiau-kang
tiau-kang |
語詞
挑工
⭕
㊟Ⓒ
刁工
ⓀⒸ
調工
ⓀⒸ
朝工
⭕
ⓀⒸ
兆工
ⓀⒸ
親成漢字
㊟工 |
|
現代台語（海口音・稻江音云云）那像無講「*tiâu-kang」「*thiâu-kang」。「Thiau-kang」甲「*tiâu-kang」省關係、咱無確實。「Tiau-kang」打算是双原詞、「thiau-」濫「*tiâu-」、亞是因爲腔口透濫來産生。《台日》「thiau-kang」（主）「tiau-」（別）「thiâu-」「tiâu-」總收。EMBREE 干礁收「thiau-」「tiau-」。《厦英》記「tiâu-kang」、無記別个音、大概記無樵全。注意、《人民閩南典》（297）收「thiau-kang」（漳、泉、下門）「thiau-tî」（泉、下門）「thiau-thî」（漳）「thiau-ì-kò͘」（泉、下門）「thiau-kò͘-ì」（漳、下門）、無收「*tiâu-」云云。仝欵、《新加坡閩南典》（173、181）甲《漳腔典》（515）干礁收「thiau-kang」云云、無收「*tiâu-」。《台日》夭有收「thiau、thiâu」『態と。態態。故意に。殊更に。特に』、注『語原は [thiau（台日：態と人を困らせる）] と同一なるべし』甲「thiau-thiau」、仝意思。只个「thiau」《增補厦英》有收。《厦英》無。
歌仔册寫『挑工』（thiau-kang）『刁～』『調～』『朝～』『兆～』。捷發《天作良緣歌》有寫『柱工』ⓀⒸ。拱樂社个戱文有寫『挑工』（劍影、金銀、小女俠、乞食、黒染）『朝工』（金銀、乞食）『刁工』（花鼓、天涯）『兆工』（苦兒）。《英厦》（494、tiâu-kang）《台日》寫『特工』、不知咁有記述性。《甘》丸那寫『特～』。《英厦》（249、412）「tiâu-kò͘-ì」「tiâu-tî」四角字丸那寫做『特～』。請看「thiau-ì-kò͘」。那塊寫漢羅、「thiau-、tiau-」自然着寫做羅字。那卜借台灣卡那、建議寫『挑工』（thiau-kang）『朝工』（tiau-kang）。「Tiau-kang」寫做『調～』『朝～』『兆～』朗有理、不閣照 t + iau 个音節（無論調）借字个情形、論系統性甲使用基礎、借「朝」（tiau）字上合福建語、夭借「兆」字上合台灣語。「刁」字（請看）無影是漢學字。請看「thiau-lân」。
全羅《教會報》有 169 篇照傳統下門話寫「tiâu-kang」。有 28 篇寫「tiau-kang」、主要治一九二〇年以後。有 14 篇寫「thiau-kang」、主要治一九三〇年以後。《甘》收「tiâu、特」（白音）『tiâu-kò͘-ì, tiâu-ì-kò͘, tiâu-tî, tiâu-kang, tiâu-lâi, tiâu-kang-lâi』甲「thiau、刁」（漢音）『áu-bân, lām-sám, iô-tāng, tiau-bân, thiau-lân』甲「tiau、刁」（白音）『tiau-bân chiū-sī thiau-bân, sī tùn-tiⁿ ê ì-sù』。
客語有講『THIÂU-THIÂU』（前後節上平聲、～第一調）、仝意思、《現代梅縣典》（119）有收、不是共台灣海峽語借个。台灣客語夭有講『THIÂU-SṲ̊』（～事）『THIÂU-KU-YI』『THIÂU-KÛNG』。『THIÂU-』聲・韻・調甲「thiau-」有對應。「挑」字減彩是漢學字。
|
建議
thiau-kang ⇄ 挑工
tiau-kang ⇄ 朝工
相關个詞
thiau-ì-kò͘, tiau-
Sam-tiau-kak thiau-lân... pàng-tiau -tiāu ("tàn-~")
相關个字
挑 (thiau)
朝 (tiau) 朝 (tiâu) 調 (tiâu) 調 (tiāu) 兆 刁 條、条 |
|
GÍ-SÛ
chhiàm-koân
chhiàm-khoân chiàm-koân chiàm-khoân |
語詞
占權
⭕
㊟Ⓒ
僣權
⭕
ⓒⒸ
僭～ ⭕ ⒸⒸ
親成漢字
㊟權 |
|
「Chhiàm-koân」是原形、照講是漢文借詞、按通行漢文來。「Chiàm-k(h)oân」看欵有双港詞源、一港「chhiàm-k(h)oân」、一港「chiàm」、相磅生「chiàm-k(h)oân」。《台日》寫「僭權」。歌仔冊寫「占權」恰多、嗎有一半本仔寫「佔高」。
呂宋《西支》有收「USURPAR」『僣』（*chhiàm）。
|
建議
chiàm-k(h)oân ⇄ 占權、僭 (僣) 權
chhiàm-k(h)oân ⇄ 僭 (僣) 權
相關个詞
chiàm (占)
相關个字
鐕、鐟
潛、潜 僭、僣 權 |
|
GÍ-SÛ
khu-lo̍k-pō͘
kū-lo̍k-pō͘ *kī-lo̍k-pō͘ |
語詞
俱樂部
⭕
區樂部
⭕
親成漢字
㊟樂部 |
|
「Kū-lo̍k-pō͘ 」是書面日語借詞、詞原「俱樂部」（クラブ、新字体『倶楽部』）、甲「khu-lá-buh」仝源、不閣「khu-lá-buh」是按口語借个。現此時「kū-lo̍k-pō͘」恰少人講。主流音「khu-」。無人講「*khū-」。「俱」字本底無讀 *khu。
許嘉勇先生（公開个面冊、2020）八推論、「khu-lo̍k-pō͘」第一節是去乎日語「クラブ」扭（giú）去个。今《台日》收「kū-」「kī-」、EMBREE（1973）甲《白話基礎語句》（1956）干礁記「kū-」。無的確「khu-lo̍k-pō͘」頭節是台語「khu-lá-buh」牽个、不是第一手乎「クラブ」牽个。
日語「俱樂部」、東洋語文朗有借。客語講「KHÎ-LO̍K-PHŮ」（頭節上平、～第一調）。越南語講「CÂU LẠC BỘ」（俱樂部、仝欵）。
|
建議
khu-lo̍k-pō͘ ⇄ 區樂部
kū-lo̍k-pō͘ ⇄ 俱樂部
相關个詞
khuh-khuh sàu
khu-lá-buh
相關个字
俱
區 邱 |
|
GÍ-SÛ
Bí-kok
|
語詞
美國
⭕
ⓒⒸ
米國
⭕
ⓒⒸ
親成漢字
㊟國～囯 |
|
二式朗按書面來、𫔘好「米」字「美」字台語仝音。《台日》寫「美國」、無注「國」（不是日語借詞）、啞日語注解寫「米國」。《英厦》（398）有寫『大米國』。現代日語寫「米国」、啞韓國語寫「美國」多過「米國」、啞朝鮮語寫「米國」多過「美國」（황성규 2013〈美國 대 米國〉、bit.ly/3s4FlfJ）。越南語講「MỸ」（美、≠ 米 MỄ）。海陸客語講「MÍ-KOET」（米國、≠ 美 MÛI-）（彭德修 1989、欠確定）。
照講「Bí-kok」有双詞源、不閣「Bí-kok」甲海陸客語「MÍ-KOET」照講是仝時代仝背景産生个名詞。
《教會報》自一八九〇年着有寫着「Bí-kok」。
|
相關个詞
Hô-lân
相關个字
國、囯
|
|
GÍ-SÛ
phí-jū
pí-jū |
語詞
比喻
⭕
ⒸⒸ
親成漢字
比喻～諭 |
|
『譬喻、比方。藉用事物的相同點，說明解釋』（中教部閩南典）。《台日》寫『比喩』。《厦英》（186）有收。請看「*phí-jū」。
|
相關个詞
*phí-jū
phì-jū pí-lūn pí-jû
相關个字
喻、諭
|
|
GÍ-SÛ
phí-lūn
pí-lūn |
語詞
比論
⭕
ⒸⒸ
丕論
ⓀⒸ
親成漢字
比論 |
|
相關个詞
phì-lūn
pí-jū |
|
GÍ-SÛ
e-po͘
ê-po͘ |
語詞
下晡
⭕
兮晡
⭕
ⓀⒸ
親成漢字
Ｘ晡 |
|
新詞、《白話典》收做「ê-po͘」。照海口音・稻江音來看、寫『e-po͘』恰合現代台語音理。現代台文定定寫『e 晡』『e-po͘』、罕得寫『ê 晡』『ê-po͘』。前節「e-」那卜借四角字來寫、「下」字「兮」字上有基礎。建議借『兮』。卜寫傳統体『下晡』嗎是有理。有關「e-po͘」个産生、請看「e-tàu」。
傳統台羅字寫『ē-po͘』。全羅《教會報》有 2164 篇寫「ē-po͘」、干礁 14 篇寫「ê-po͘」。『E-po͘』出一半下仔、無法度知影是印掞亞不是。『Ê-po͘』凡世通看做一種過渡書寫体。請看「e-tàu」。
|
相關个詞
e-tàu
ē-po͘ |
|
GÍ-SÛ
e-tàu
ê-tàu |
語詞
兮昼
⭕
ⓀⒸ
兮晝
⭕
ⓀⒸ
下昼
⭕
下晝
⭕
親成漢字
Ｘ晝 |
|
「E-tàu」是「ē-tàu」个變体、大概二十世紀即産生。代先不知冬時有人共「ē-tàu」「ē-po͘」「ê-hng、ê-huiⁿ」前節理解做一个時間接頭詞「*ê-、e-」、自按呢産生變体「e-tàu」「e-po͘」「e-hng、e-huiⁿ」。只欵變化、洪惟仁教授共伊分析做「時間功能詞个中調化」。請參考〈閩南語音韻系統〉。路尾接頭詞「e-」閣生「e-chái」（～-á）「e-àm」。那塊寫漢羅、接頭詞「e-」自然着寫做羅字。那卜借四角字、聲調先勿論、空聲母 + e 个音節有約束卡那『下』甲『兮』。台文「下」字穡頭多。建議借『兮』。總是寫保守体『下昼』『下晡』不是無利益。『下昏』『下暗』嗎通講是約束字。雖然台灣話有演變、照舊寫『下～』嗎是足有理个。
照鹿港音甲稻江音來看、現此時只个接頭詞「e-」用第一調、無論腔口。傳統羅字台文寫『ē-tàu』『ē-po͘』『ê-hng』、不閣自頂世紀着有人寫『ê-tàu』云云。凡世加減有受着『ê-hng』个影响。咱將只个『ê-』看做過渡体。現代台文丸那寫『e 晝』『e-tàu』多過『ê 晝』『ê-tàu』。請讀潘科元〈頂晡、頂晝；下晡、下晝〉。論書寫、『ē-tàu』『ē-po͘』『ê-hng』（寫法）由原通看做「e-tàu」「e-po͘」「e-hng」（音）个保守体。
全羅《教會報》有卜倚二百篇寫「ē-tàu」「ē-tàu-sî」。38 篇寫『ê-tàu』『ê-tàu-sî』。寫「ê-」个、大多數朗治一九三〇年以後。
|
相關个詞
ê-hng, e-hng
e-chái e-àm e-po͘ ē-tàu |
|
GÍ-SÛ
sit-khì
|
語詞
失去
⭕
ⒸⒸ
親成漢字
失去 |
|
「Sit-khì ì-gī」「sit-khì khòng-chè」云云、中華時代个話、大概有二港詞原。一港是「sit khì chheng gōa gîn」（失去千外銀）彼个「sit khì」、在來詞。一港是中國語『失去』。《教會報》「sit-khì」自一九五〇年代雄雄變常用。治彼个進前、在來詞「sit khì」眞罕用。
《白話典》有收「sit-khì」『喪失』、例句「sit-khì k(h)oân-lī」。「Sit khì chheng gōa gîn」彼个 sit khì 以外、台語在來夭有講「sit-khì」（失氣）、《台日》注解『虛脫。血液の循環がわるい』『氣がぬける』。
|
相關个詞
sit khì ("ke-hé ~ chheng gōa gûn")
|
|
GÍ-SÛ
*mè-chì
*mè-chih *bêng-chì *bêng-chìⁿ |
語詞
㊟
親成漢字
名㊟ |
|
請看「bêng-chhì」「mè-sì」。
|
相關个詞
bêng-chhì
mè-sì |
|
GÍ-SÛ
*kim-chio
|
語詞
金蕉
⭕
ⒸⒸ
親成漢字
金蕉 |
|
《台日》（頂 329）無收、台文運動進前个台羅文献嗎無塊寫、照咱所知。原底个講法照講是「keng-chio」。「Kin-chio」是單純个變体、不閣「kim-chio」照講不是。照講恰早不知冬時、有人共「kin-chio」理解做「kim-」（金）鬥「-chio」、自按呢造一个新詞「金蕉」。請看「keng-chio、kin-chio」。
恒春「金蕉灣」、《台地典》記音「Kim-chio-oan」、注解『「形似香蕉的彎曲地」。係指沿海的凸岸地』。《地名服務網》寫『香蕉灣』『芎蕉灣』『芭蕉灣』、無寫『金～』、有錄音（bit.ly/3kQ3aX5）。
|
地名・水名
恒春金蕉灣 ㊁㊟
㊁ 台地典
相關个詞
keng-chio, kin-chio
|
|
GÍ-SÛ
phì-lūn
*phí-lūn |
語詞
丕論
ⓀⒸ
譬論
⭕
ⒸⒸ
親成漢字
㊟論辟～ |
|
《台日》「phì-lūn」寫做『譬論』、注講含「pí-lūn、phí-lūn」仝意思。《厦英》（394）有收。《甘》phì 有收「譬」『hiáu-jū, kà-sī, phēng, gī-lūn, siat-sú, phì-jū』甲「辟」『kà-sī, pí-phēng, gī-lūn, siat-sú, phì-jū』。《台日》「phí-lūn」寫做『比論』、注講含「pí-lūn」仝意思。EMBREE 甲《厦英》《增補厦英》朗無收。「Phí-lūn」打算是双原詞、父母「phì-lūn」甲「pí-lūn」。不閣請看「ká-sú」。全羅《教會報》有 11 篇寫「phí-lūn」、尾擺一九四〇年。干礁 1 篇寫「pí-lūn」。有 130 篇寫「phì-lūn」。歌仔册『丕論』ⓀⒸ 大概是塊寫「phí-lūn」、嗎有可能是塊寫「phì-lūn」。唐山歌仔册夭有一半本仔寫『鄙～』Ⓚ。
「Phì-lūn kóng」《中教部閩南典》（2022 年查）注解『比方說。譬如、舉例來說』甲『假設』二項意思。「Pí-lūn」注解『打比方、比如』。
|
相關个詞
phì-jū
*phí-jū pí-lūn ká-sú
相關个字
丕
鄙 |
|
GÍ-SÛ
chhut-gia̍p
|
語詞
出業
⭕
ⒸⒸ
親成漢字
㊟業 |
|
「Chhut-gia̍p」有双港詞源。一港、日語借詞「chut-gia̍p」。一港、在來詞「chhut」。「Chut-」變做「chhut-」不是單純个音變。《台日》干礁收「chut-gia̍p」無收「chhut-gia̍p」、不閣高・陳（1956）有介紹「chhut-gia̍p」。全羅《教會報》有 9 篇寫着「chhut-gia̍p」、自一九二四年。歌仔冊有幾若本寫「出業」。
|
相關个詞
chut-gia̍p
|
|
GÍ-SÛ
bió
*biáu |
語詞
秒
⭕
Ⓒ
親成漢字
秒 |
|
日本時代頭、台語講「biáu」（日台・下 977）、含《英厦》「SECOND」『⋯⋯(OF TIME) 𣺌 biáu⋯⋯』一致、不閣《日台》寫『秒』。《台日》「bió」「biáu」朗有收。《白話典》注講「bió」是書面日語借詞。「Bió」照講有二港詞原。一港是「biáu」。一港是日語『秒』（べう）。「秒」字原底干礁讀漢音 biáu、無別个音。Bió 看起來甲 io（腰）pio（標）者个早音仝延、其實連《甘》一九一〇年代都無記着 bió。Bió 照講是塊學日語『べう』亞是『べう』甲『びょう』即來産生个。《教會報》一九三〇年即頭擺有人寫「bió」、夭一九六〇年代夭有人塊寫「biáu」。
|
|
GÍ-SÛ
bōng-pâi
bō͘-pâi |
語詞
墓牌
⭕
ⒸⒸ
親成漢字
墓牌 |
|
拾起黃塗活版所出版个、台灣歌仔册專寫『墓牌』。唐山歌仔册甲黃塗个歌仔册有寫『墓碑』、那用帶句尾、朗押 -i 韻恰多、亞是專押 -i 韻、着是塊寫「*bō͘-pi」。《台日》有收「bō͘-pi」、寫做『墓碑』。《台日》「bōng-pâi」寫做『墓牌』、「bō͘-pâi」煞寫做『墓碑』Ⓗ。「Bōng-pâi、bō͘-pâi」照講是双源詞、「pâi」（牌）甲漢文「墓碑」（bō͘-pi）所生。
地名。請看「*Bōng-pâi-thâm」。
《教會報》有 1 篇寫「bō͘-pi」、一八九〇年。4 篇寫「bō͘-pâi」。32 篇寫「bōng-pâi」。
客語『MU-PÎ』（墓碑）・韓語『묘비』（墓碑）・日語『墓碑』（ぼひ）・中粤語『墓碑』甲「*bō͘-pi」仝源。（日語『墓石』恰常用个欵。）越南語有講『BIA MỘ』（碑墓）。《中華漢方典》（6423）『墓牌』下底干礁下門語・永春（泉州）語・福州語个例詞。福州語・台灣海峽語「墓牌」照講云那含汎東亞語「墓碑」有相關。照講「碑」字相對罕用、「牌」字恰常用、啞台語「pâi-pián」彼个 pâi- 意思甲漢文「碑」字个字義有淡薄仔相倚。自按呢産生「bō͘-pâi、bōng-pâi」只个語詞。不是「碑」字單純讀做 pâi。那按呢、會綴「卑」字（凡世閣有「埤」字）讀做 *pi、也着是「碑」字个本音。請看「chio̍h-pâi」。
|
相關个詞
*Bōng-pâi-thâm
chio̍h-pâi
相關个字
碑
牌 墓 |
|
GÍ-SÛ
*be̍h-á-lù
**be̍h-á-luh **be-a-luh *bê-á-luh |
語詞
㊟
親成漢字
麥ＸＸ麦ＸＸ |
|
「Be̍h-á chiú」頭、「bì-lù」尾。三个詞仝意思。
|
建議
*be̍h-á-lù ⇄ 麥仔呂、麥仔ル
相關个詞
be̍h-á chiú
bì-lù
相關个字
呂
ル (流) |
|
GÍ-SÛ
hong-hiám
*hông-hiám |
語詞
方險
⭕
ⓀⒸ
親成漢字
㊟險～嶮 |
|
現代名詞「hong-hiám」主要是中治時代共中國語借个（白話典）、詞原『風險』（风险、FĒNGXIǍN）。不閣台語在來嗎有名詞兼性詞（形容詞）「hong-hiám」。請看下脚。《台日》收「hong-hiám」『危い。危險』、寫做『凶險』、詞例「hong-hiám-chèng」。「Hong-hiám」《厦英》《增補厦英》無收。《厦英》收「hông-hiám」『DANGEROUS; IN GREAT DANGER, AS AFFAIR OR DISEASE』（130）、前節無注對漢音（～無牽漢字、153 葉）。《英厦》（99）有寫『峰險』『hong-hiám』。歌仔册有寫『方險』『風～』。唐山歌仔册八寫『防〓』。〓、「嶮」字、正平半『僉』半『㑒』。不八有人寫『*奉險』『*雄險』『*凶險』、照咱所知。外來詞「hong-hiám」、漢羅台文有照中文个習慣共寫做『風險』。今外來詞「hong-hiám」産生个時、照講由原有濫着在來詞「hong-hiám」个因素。閣再講、中文『风险』（風險）頭字無的確不是親漢字。咱無確實。請看下脚。夭日・韓語嗎無『*風險』只个詞。寫『風～』不那無省乜國際性、嗎無合在來詞「hong-hiám」个詞原、甚至嗎無一定有合中華語『风险』个詞原。寫『方～』顚倒恰有利。夭咱那借「奉」字、「方」字通留乎 h + ng 个音節。請看「hō͘ lâng、hông」。那塊寫漢羅、建議寫『hong 險』。
唐山《客法》（209）有收「HIÛNG-HIÁM」『DANGER, ÊTRE EN DANGER, DANGEREUX, GRANDE DIFFICULTÉ』、注講含『NGÙI-HIÁM』（危險）仝意思。台灣客語歌仔册有寫『凶險』。英語『RISK』、韓語講『위험』（危險）。日語講『危険』（きけん）。英漢 LOBSCHEID『RISK』下底收「險」「危」「危險」云云（1503）。『DANGER』『DANGEROUS』『DANGEROUSLY』下底嗎是收「險」「危」「危險」云云（556、557）。《中教部國語典》『風險』（FĒNGXIǍN）嗎朗無注古早用例。《現代漢方典》（2833）『風險』干礁收下門語詞例。《西支》『PELIGRO』甲『RIESGO』下底無收「*h(i)ong-hiám」「*hông-hiám」。
|
相關个詞
Lâm-hong-ò-á
Hái-hong hong-hiòng hō͘ lâng, hông hńg, hǹg, hngh (嘆詞)
相關个字
方
奉 |
|
GÍ-SÛ
gè-m̀
gè-mh giàn-mh |
語詞
㊟
親成漢字
ＸＸ |
|
詞原英語『GAME』亞是日語『ゲーム』、亞是二項朗有、双原。《台外典》記「gè-m̀」（注英語詞原）甲『gè-mù』（注日語詞原）。請看「*kha-lú-siù-m̀」。
|
相關个詞
*kha-lú-siù-m̀
|
|
GÍ-SÛ
Hù-kùi-kak
|
語詞
富貴角
ⒸⒸⒸ
冨～～
親成漢字
富貴角冨～～ |
|
台北石門地名。《堡圖》記『冨貴角』。日本時代官方八設一个官方名「富基角」。《教會報》308 号（1910）有一篇寫『Tī Tâi-oân ê chīn-pak chi̍t só͘-chāi miâ Hù-ki-kak (pún-miâ Hù-kùi-kak)⋯⋯』。
「Hù-kùi-」双詞原。一港是荷蘭語『HOEK』（HOECK、HOUCK）。一港是「hù-kùi」。翁佳音《大臺北古地圖考釋》（twstudy.iis.sinica.edu.tw/OldMap/doc/Taipei/Taipei05.htm）寫講『自伊能嘉矩以來，一般人對於「富貴角」命名來源的解釋，都是根據一七二六年荷蘭宣教師法連太因（VALENTIJEN）《新舊印度誌》一書所載的臺灣地圖。由於該圖北部之處有「DE HOEK VAN CAMATIAO」的地名，因此認定「富貴角」一語起源於荷蘭人命名的「HOEK」，後來漢人就取其譯音字，而改稱「富貴角（Hù-kùi-kak）」』『固然「富貴」是荷語「HOEK」的臺語譯音，HOEK 音 [hu:k]，意為「岬角」。但上述論點引用法連太因之地圖來解釋，卻值得商榷』『我還是認為：麟山鼻與富貴角在荷蘭時代一般都被泛稱「HOEK」，頂多再以顏色或前後分個第一岬角、第二岬角以示區別而已。這兩座岬角似乎不像野柳那樣，前面冠有其他名稱。後來漢人在指稱與記錄「富貴角」地名時，也直接音譯並採用吉祥字「富貴」，至於富貴之後的「角」字，恐怕是更後來的人所加上』。
|
|
GÍ-SÛ
kin
kun |
語詞
跟
⭕
Ⓒ
親成漢字
㊟ |
|
「Kin tiâu-tiâu」云云、稻江音「kun」、保守泉音「kṳn」。「Kin lâng o̍h」云云、南部話个欵、打算是双原詞。請看下脚。「Kin tiâu-tiâu」彼个 kin・kun、《厦英》無收。《台日》甲王育德《常彚》甲《中教部台語典》有。《增補厦英》（121）有收「nā ū lâng kun ·teh」『IF HE HAS SOME ONE BESIDE HIM』甲「kun chia̍h」『TO WAIT AT TABLE; A WAITER』。歌仔册寫『跟』。有幾落本寫『根』Ⓚ。
台南王育德《常彚》「kin、kun」有甲句例「kin sin-seⁿ o̍h」『先生について習う』。恰中・北部底个詞典從到今不八注解只个意思（～不八收只个 "kin"）个欵。傳統歌仔册有寫『近人學』『近伊學』云云、不八寫『*跟人學』云云。大概「kin」甲動詞「kīn」倚音閣小可倚意、「近先生」（台日：先生に就く）彼个意思治南部煞乎「kin」搶去。
|
相關个詞
kīn, kūn (近)
|
|
GÍ-SÛ
ìm-sīⁿ
ìm-sī |
語詞
蔭豉
⭕
䕃豉
⭕
親成漢字
蔭㊟䕃～ 陰～ 隂～ |
|
現代約束字『蔭豉』。《台日》寫『蔭豉』。歌仔册有一半本仔寫『蔭豉』『～是』Ⓚ『～示』Ⓚ。鹿港語有講「ìm-sī」（中教部閩南典）。請看「tāu-sīⁿ、-sī」。有關「-sīⁿ、-sī」个詞原、請看「tāu-sīⁿ、-sī」。
|
相關个詞
tāu-sīⁿ, -sī
sīⁿ (豉) ìm-si
相關个字
蔭、䕃、荫
|
|
GÍ-SÛ
thian-káu-jia̍t
|
語詞
天狗熱
⭕
ⒸⒸⒸ
親成漢字
天狗熱～～𤍠 |
|
照講双原、一港詞原日語『デング熱』、一港詞原「Thian-káu」（台日：邪神の名）。全羅《教會報》有 1 篇寫『Thian-káu-jia̍t』、治一九四八年。
|
|
GÍ-SÛ
hit tong-sî
*hiòng-sî |
語詞
彼當時
⭕
ⒽⒸⒸ
許當時
⭕
ⓀⒸⒸ
喜當時
⭕
親成漢字
Ｘ當時 |
|
合音体「hiòng-sî」、《台日》寫做『向時』ⓀⒸ。《台日》顚倒「hit tong-sî」無收。全羅《教會報》干礁 3 篇用着「hit tong-sî」、朗治一九五六〇年代。只个語詞个水頭照講是「hit tang-sî」甲書面詞「tong-sî」（當時）。一九三〇年代个歌仔册有寫『喜當時』『彼當時』。請看「hit tang-sî」。
|
相關个詞
hit (彼、許、喜)
hit tang-sî
相關个字
當、当 (tong)
|
|
GÍ-SÛ
lak soe
|
語詞
轆衰
⭕
ⓀⒸ
落衰
⭕
ⒸⒸ
親成漢字
落衰 |
|
只个語詞相對恰新、《台日》無收。照講是「lak sui」（請看）甲「soe」（請看）互動來産生个。《教會報》不八寫着「lak-soe」「lak sui」、干礁 3 篇有用着「lo̍h-soe」。拱樂社个戱文有寫『落衰』（皇帝）。瑞成《勸改酒色新歌》有寫『世間那借咱經過 一藏親像鳥塊飛 恰多財産都能賣 恰紅亦是能落衰』。玉珍《好笑秦王姜女祭杞郎新歌》有寫『女性今年是十八 伊名美女親像花 怨嘆花柳無心做 環境壓迫葉落衰』。開文《杜十娘怒沉百寶箱》有寫『李甲氣運眞落衰 朋友恰慘來會齊 聽見借錢只二字 隨時變面無仁義』、「落衰」打算是塊寫「lo̍h-soe」。歌仔册『落衰』押 -ui 韻恰多（～lak sui）。『轆衰』專押 -ui 韻。
論連劃、請看「lak sui」。
|
相關个詞
lak ("~ tī thô͘-kha")
soe (衰) lo̍h-soe lak sui
相關个字
轆、鹿 (lo̍k)
|
|
GÍ-SÛ
ōe hó͘-lān
ūi hó͘-lān |
語詞
畫虎玍
⭕
ⒸⒸⓉ
親成漢字
畫虎Ｘ畵～Ｘ |
|
澎湖話（中教部閩南典）甲唐山福建語（普閩、）有講「ūi hó͘-lān」。《台日》無收「ōe hó͘-lān」「hó͘-lān」、不閣有收「ūi hó͘、ōe hó͘」（畫虎）『虎を畫く』甲「ōa hó͘」（畫虎）、無注解、例句有「ōa hó͘ ōa phê lân ōa kut」（畫虎畫皮難畫骨）『虎を畫くに皮を畫くは易きも骨を畫くは難し、皮相は知り得られるが眞相は握難い』。只句歌仔册有寫（瑞成・南洋遊歷新歌、會文・最新王昭君和番歌） 。夭有一句『畫龍畫虎難畫骨』、下句『知人知面不知心』（開文・最新搖古歌、尚古山房・梁山伯祝英台全傳）。「Ōe-、ūi hó͘-lān」个水頭大概治者。「畫虎難畫骨」那「畫骨」省起來、聖聖春「*畫虎 làn」（稻江腔）「*畫虎 lān」（主流台語）、𫔘好乎常用・萬用詞素「lān」通倚身。
「Ōe-、ūi hó͘-lān」大概二十世紀中節即産生、啞「hó͘-lān」閣恰路尾。劉建仁先生寫講『作者的經驗是在 1950 年代末期的台灣北部上班族之間 [ōe hó͘-lān] 一詞已經很流行了』（bit.ly/3uHQlnC）。《白話典》有收「ōe hó͘-lān」、漢羅寫做『畫虎 lān』、嗎有收「hó͘-lān-chhùi」「hó͘-lān-sian」、不閣無收「*hó͘-lān」。《台日》甲王育德《常彚》甲 EMBREE 朗無收。一九九一年、陳修《台灣話大詞典》「畫」字甲「虎」字下底有收「ōe hó͘-lān」、是台灣島內第一本（劉建仁文）。
周長楫《閩南語詞典》「鬼」字『鬼画符』下底有收「ōe hó͘-lān、ūi hó͘-lān」甲「ōe hó͘-niau、ūi hó͘-niau」。
《台日》夭有收「hó͘-sai-nâ」（"虎獅拿"）『誤魔化して取込む。瞞着してせしめる』。歌仔册有幾那本寫『虎獅籃』。含「ōe-、ūi hó͘-lān」大概無省相關。
劉建仁先生八提議講「hó͘-lān」是部份个日語借詞、詞原日語『法螺を吹く』（ほらをふく）前二「節」。上早『開始時可能用 [hó͘-lān] 戲稱日語ほら（HO-RA，法螺），流行之後，因為日語 "法螺を吹く"（HO-RA-O-FU-KU）有說大話、說誇大不實的話、胡說八道的意義，於是用 "畫虎卵 [ōe hó͘-lān]" 來對應，新詞就產生了』。咱不敢講只个因素透底無、不閣唐山福建語冷戰時代丸那有講「ōe-、ūi hó͘-lān」。假使講「hó͘-lān」是口語日語借詞、卜治冷戰時代炭對金門以外个閩南是無可能个代志。啞照字詞典甲中文刊物个証據、台語是先有講「ōe-、ūi hó͘-lān」以後即有講「hó͘-lān」。通知「ōe-、ūi hó͘-lān」个主要詞原是『畫龍畫虎難畫骨』恰大面。
|
相關个詞
lān (玍)
相關个字
畫、画
|
|
GÍ-SÛ
sàu-chhiú
|
語詞
掃手
⭕
ⒸⒸ
親成漢字
掃手 |
|
双原詞。請看「sàu-chiú」。
|
建議
sàu-chiú ⇄ 掃箒、掃帚
相關个詞
sàu-chiú
|
|
GÍ-SÛ
tô͘-chí
*to͘-chí to-chí |
語詞
刀子
⭕
㊟Ⓒ
刀指
㊟Ⓚ
刀只
⭕
㊟Ⓚ
親成漢字
廚子厨～ |
|
「Tô͘-chí」打算對潮州語來。潮語講『TÔU-CHÍ』。「To-chí」減彩有二三个詞原、着是「tô͘-chí」・名詞「to」甲潮語『TÔU-CHÍ』只三項个組合、亞是『TÔU-CHÍ』孤一項。《台日》有收「tô͘-chí」『料理人。コック』、寫做『厨子』。閣有「to-chí」『料理人。板場。板前。料理人。賄』、寫做『刀子』。《明治台職彚》有寫『刀子』（to-chí）。《英厦》二項朗無寫着个欵。「Tô͘-」《厦英》凖做「厨、廚」字个一个白音、詞例干礁「tô͘-chí」孤一項。「To-chí」無收。《增補厦英》仝欵。《甘》tô͘ 有收「廚」『tô͘-chí, chiū-sī tsú-chia̍h ê lâng』。《補彚》《八音》*to・*tô͘・*tô・*to͘ 無收相關字詞。唐山歌仔册《四民經紀通俗歌》寫『刀子』。現代台灣社會慣勢寫『刀子』『～師』（to-chí-sai）、嗎有人寫『刀指～』。『刀子師』三字固定讀做台語「to-chí-sai」、照咱所知。無人共伊讀做中國話（*DĀOZISHĪ）。夭『廚～』（厨～）無社會基礎、雖然字詞典有寫。
全羅《教會報》有 3 篇寫「tô͘-chí」。2 篇寫「to͘-chí」。1 篇寫「to-chí」、一九四〇年。EMBREE 由原收「tô͘-chí」無收「to-chí」。福建語《漳腔典》（187）收「tô͘-chí」「tô͘-chí-sai」、無收「*to-」云云。
潮州語『TÔU-CHÍ』、《潮詞滙》甲漢字『廚只』、注解『廚子』。《英汕》注解『ONE WHO PROVIDES FEASTS TO ORDER』。《英汕》甲 FIELDE 夭有收『TÔU-PÂNG』、解說做『(A) COOK-HOUSE』。現代潮州語有收『TÔU-PÂNG』（～房）『TÔU-GŌI』（～藝）云云（MOGHER）。TÔU 是「廚」字个漢音（MOGHER）。中國語嗎有講『厨子』（廚～）、倚意。官話夭有講『厨子老师』云云（中華漢方典 5981）。廣東陽江話有講『厨子佬』（仝、用字照中華漢方典）。『TÔU-CHÍ』（潮）「tô͘-chí」（台）照講含中語『厨子』仝原。只个「tô͘-」治台語・福建語內底無用帶別个詞。
「廚、厨」字《廣韻》直誅切、屬虞韻、含「雨」字「芋」字「傅」字「扶」字仝韻、甲 tô͘ 有對應。不閣 tô͘ 干礁用治「tô͘-chí」。
|
相關个詞
chí ("kiat ~")
io-chí
相關个字
厨、廚
途 刀 |
|
GÍ-SÛ
chù-im
chù im |
語詞
注音
⭕
ⒸⒸ
親成漢字
注音註～ |
|
名詞「chù-im」照講是一九三四〇年代共中國語借个。動詞組「chù im」大概双原、有在來詞「chù」甲「im」个因素。《台日》無收。《增補厦英》（265）有收「chù-im ê jī-bú」『THE NEW SCRIPT』。EMBREE 有收「chù-im hû-hō」（無用大本字）『PHONETIC SIGNS, PHONETIC SYMBOLS』甲「chù-im jī-bú」『PHONETIC ALPHABET』、無收「*chù-im」。《教會報》自一九三〇年代着有寫動詞組「chù im」（chù-im）甲名詞「chù-im」。Lo̍h Sian-chhun〈Sin Sèng-si chhut-hiān lah!〉（621 号、1936）有寫『Nā ū kî-thaⁿ bô chù im, á-sī bô tú-hó ê só͘-chāi』。
Lo̍k Sian-chhun（Lo̍k → Lo̍h？）〈Ēng sim gîm-si o-ló Chú〉（623 号、1937）有寫『chù chù-im ê chhò-gō͘』。Ô͘ Bûn-tî〈Tio̍h Phó͘-kip Lô-má-jī〉有寫『Tâi-oân ōe ê tē-it im, chiū-sī kok-im tē it siaⁿ, án-ni lán kóng sam (三) kok-im chiū-sī san, pîⁿ-pîⁿ bián chù im, im-tiāu siāng khoán』、「im」是聲調个意思、夭「chù im」是落聲調記号个意思。《教會報》自一九四八年有寫着『chù-im kì-hō』（Chù-im kì-hō）、是塊講中華民國語个音標。自一九五〇年代嗎有寫着『chù-im hû-hō』。
日・韓語無講『*注音』、照咱所知。
傳統羅字台文不八寫「*phiau-im」「*piau-im」「*kì im」、照咱所知。
|
|
GÍ-SÛ
choh-sit
chò-sit chòe-sit |
語詞
作失
ⒸⓀ
做失
ⓀⓀ
作嗇
⭕
ⒸⒸ
作穡
⭕
ⒸⒸ
做嗇
⭕
做穡
⭕
親成漢字
作嗇～穡 |
|
歌仔册寫『作失』恰多。有幾那本寫『做失』、嗎有一半本仔寫『做殖』ⓀⓀ。《台日》寫『作穡』。《英厦》（536）「choh-sit」甲四角字『耕種』。歌仔册在來不八寫「穡」字、不閣《千金譜》有寫『后稷教民稼穡』。請看「Sian-sek-kiong」。那塊寫漢羅、「-sit」寫做羅字丸那成有理。
呂宋《西支》有收「SEMBRAR」『穡』（*sek）、「穡」字用『囬』。
論連劃、傳統台羅字專寫『choh-sit』、用連劃。
羅字台文上慢自一九五〇年代着有人寫「chòe-sit」「chò-sit」（DADWT、教會報）。EMBREE 只二項朗有收。「Chò-sit、chòe-sit」是双原詞、「choh-sit」甲動詞「chò、chòe」透濫來産生个。上早照講是「choh-sit」乎人（特別是囝仔）理解做「*chò sit」。
|
建議
choh-sit ⇄ 作嗇、作穡
chò-, chòe-sit ⇄ 做嗇、做穡
相關个詞
Sian-sek-kiong
chò, chòe (做)
相關个字
穡
嗇 |
|
GÍ-SÛ
lêng-tī
|
語詞
凌治
⭕
Ⓒ㊟
親成漢字
凌㊟夌～ |
|
「Lêng-tī」只个詞大概是十九世紀尾以後即産生个。詞原照講有二港。一港是在來詞「lêng-tî」。一港是「chhòng-tī」彼个 -tī。《台日》「lêng-tî」甲「lêng-tī」朗寫做『凌遲』。傳統歌仔册有寫『凌治』。歌仔先大概有冬時將「lêng-tī」寫做『凌遲』。
《厦英》無收。《厦英》（300）有收「lêng-tî」『TO PUT TO DEATH BY CUTTING IN PIECES WHILE ALIVE』甲「lêng-tî ·lâng」『TO ANNOY PEOPLE VERY MUCH (SAID OF A CHILD THAT WON'T SLEEP, OR OF A MASTER WHO MAKES HIS HANDS OR SERVANTS MISERABLE)』。《英厦》（540）『TORMENT』下脚有收「lêng-tî」、漢字寫做『凌㓾』。《台日》有收「lêng-tī」『虐めて困らせる。いびって苦める。訶む。虐げる』、寫做『凌遲』。閣有「lêng-tî」（凌遲）『手足を順次に斷ち去りなどして成る可く多くの苦を與へて殺す。嬲殺』、注「文」。「Lêng-tî」閣注一項意思、甲「lêng-tī」相仝。
唐山歌仔册上慢自一九一〇年代着有寫『凌治』。羅字台文治一九五〇年以後即有定定寫「lêng-tī」、照咱所知。不閣《教會報》一八九九年有一篇文（Bûn Ko͘-niû・Pó-sioh Cheng-siⁿ）寫「lêng-tī」。不知咁是無張池注不着調。
|
相關个詞
chhòng-tī
lêng-tî
相關个字
遲、遅
|
|
GÍ-SÛ
lāu-sia̍p
*lāu-siap |
語詞
漏渉
⭕
ⒸⓀ
親成漢字
漏㊟ |
|
《台日》無收。只个詞照講有恰新。《教會報》一九六七年頭擺用着。EMBREE 有收「lāu-siap」、後節第四調、注解『LEAK (INFORMATION, SECRET, ETC)』（英）『洩漏』（中）。「Lāu-sia̍p」「lāu-siat」無收。《白話典》注講「lāu-sia̍p」是「lāu-siat」个變体、不閣「lāu-sia̍p」照講是双原詞、第二港原頭動詞「sia̍p」（"~ chúi"）亞是「sia̍p-lāu」。「Sia̍p-lāu」《台日》（下 642）寫做『涉漏』。請看「sia̍p」（×2）。那塊寫漢羅、建議學《白話典》寫『漏 sia̍p』。
|
相關个詞
lāu-siat
sia̍p ("~ chúi") sia̍p ("khit kúi ~ ·khì") |
|
GÍ-SÛ
hì-lāng
hí-lāng |
語詞
喜弄
⭕
㊟Ⓒ
戱弄
⭕
戲弄
⭕
親成漢字
㊟弄 |
|
台灣海峽語原底朗講「hì-lāng」、不閣主流泉語第三調橫調是高平調、對講漳底・同安底和老語（～台語）个人來講、听起來親像「*hí-lāng」、𫔘好閣乎人想着「hí-sū」（喜事）「hí-lo̍k」（喜樂）云云。今現代台語「hí-lāng」打算是双原詞、老母「hì-lāng」（戱弄）、老父「hí-」（喜）。《台日》「hí-lāng」收做主音、不閣「hí-lāng」「hì-lāng」朗寫做『戱弄』。總是傳統羅字台文大常寫『hì-lāng』、罕得寫『hí-lāng』。EMBREE 干礁收「hì-lāng」。全羅《教會報》干礁 2 篇寫『hí-lāng』、治一九三〇年代。不閣台灣歌仔册大多數寫『喜弄』、罕得寫『戱～』（戲～）。
杜建坊先生八寫講『「戲弄」→「喜弄」个因端是漳泉聲調濫，（大部分）漳乎泉吞去！』（公開面册、2014 年左右）。「Pòaⁿ-tháng-sai」凡世嗎是按呢來産生个。「Chù-ì」講「*chú-ì」減彩加減有只号因素。
|
建議
hì-lāng ⇄ 戱弄、戲弄
hí-lāng ⇄ 喜弄
相關个詞
hì (戱、戲)
chù-ì
相關个字
戲、戱 (hì)
|
|
GÍ-SÛ
Ke-lâng
*Ke-lang Koe-lâng |
語詞
基隆
ⓗ
鷄籠
ⒸⒸ
雞籠
ⒸⒸ
圭籠
ⓉⒸ
親成漢字
雞籠鷄～ |
|
〈前後山輿圖〉有記『圭籠街』『圭籠澳』。點石齋《臺省民主歌》寫『圭良』。二十世紀个文献寫『基隆』恰多、包含《堡圖》。只个寫法是清官一八七〇年左右照官話音所改。論産生、『基隆』二字甲『萬華』仝欵、是外文。台語「基」字無讀 ke・koe、「隆」字嗎無讀 lâng。總是台灣社會有共『基隆』訓讀（hùn-tho̍k）做「K(o)e-lâng」、全台文文献嗎有共「K(o)e-lâng」寫做『基隆』。只点甲『萬華』無仝。
「鷄籠」只个地名治亞州大陸是「菜市仔地名」。韓國嗎有一个「鷄龍」（계룡）市。假使講台灣鷄籠只个地名个産生正實含『KETAGALAN』相關、那按呢、「K(o)e-lâng」着是双詞原。
日本体制『基隆』市對應中華体制『基隆』市減七堵區・暖暖區。不那『基隆』市、台北州東平（瑞芳街、萬里庄、金山庄、七堵庄、"貢寮" 庄、双溪庄、平溪庄）朗屬『基隆』郡。
那台北三芝「Sió K(o)e-lâng」、《堡圖》有記『小基隆新庄』『～舊庄』。捷發《百草問答相褒歌》（1934）有寫『小圭籠』。福成宮官方寫『三芝小基隆福成宮』。請看「Sam-chi」。
《堡圖》苗栗銅鑼有記『老鷄隆』『新鷄隆庄』。〈前後山輿圖〉有記『舊圭籠』、大概甲『老鷄隆』是仝一个所在。閣有『新雞籠』、位置各樣。
|
地名・水名
台北三芝小基隆ᴴ
行政地名
日本体制基隆市 ⊂ 中華体制基隆市 ㊟
相關个詞
Sam-chi
相關个字
鷄、雞
龍 基 隆 |
|
GÍ-SÛ
êng-ióng
êng-iáng |
語詞
營養
⭕
ⒸⒸ
親成漢字
營養榮～ |
|
書面日語借詞、詞原日語『營養』甲『榮養』、新字体『営養』『栄養』。請讀《語源由来辞典》「栄養」彼葉。歌仔册二式朗八有人寫。現代日語寫『栄養』。中國語講『营养』（營養、YÍNGYǍNG）、無講『*荣养』（*RÓNGYǍNG）。越南語講『DINH DƯỠNG』（營養）、無講『*VINH DƯỠNG』（*榮～）。韓・朝語寫『營養』、雖然「營」字「榮」字仝音。《朝鮮典》有收「영양」（榮養）『그 지위와 명망이 높아져서 부모를 영화롭게 잘 모시는것』、無仝意思。
|
|
GÍ-SÛ
hip siōng
hip siòng hip siàng *hìm siàng |
語詞
翕相
⭕
ⓀⒸ
翕像
⭕
ⓀⒸ
翕象
⭕
ⓀⒸ
親成漢字
㊟ |
|
論詞源、「hip siōng」甲「hip siòng」是無仝語詞。《台日》二式朗有收、「hip siōng」寫做「翕像」、「-siòng、-siàng」寫做「翕相」。不閣「翕像舘」「翕像術」干礁收一式。《厦英》是干礁收「hip siōng」。通知「hip siòng」打算是恰路尾即有、詞源「hip-siōng」鬥「siòng (-phìⁿ)」、双詞源。請看「hip」（翕）。歌仔冊有一半本仔寫『翕像』。
潘科元先生（公開面冊、2019）嗎是主張講「hip siōng」甲「hip siòng、-siàng」仝義・無仝源、後字愛寫做無仝字。
主流菲律賓福建語「hip siõng」（網路群組私下請教）、後節第六調。
|
建議
hip siòng, -siàng ⇄ 翕相
hip siōng ⇄ 翕像、翕象
相關个詞
hip (翕)
相關个字
相 (siòng, siàng)
像 象 |
|
GÍ-SÛ
ka-lún-sún
*ka-nńg-sún *ka-léng-sún |
語詞
加侖損
ⓀⓀⓀ
加冷損
ⓀⒸⓀ
加崙筍
⭕
ⓀⓀⓀ
加侖筍
⭕
ⓀⓀⓀ
加崙笋
⭕
ⓀⓀⓀ
加侖笋
⭕
ⓀⓀⓀ
加冷筍
⭕
ⓀⒸⓀ
加冷笋
⭕
ⓀⒸⓀ
親成漢字
Ｘ㊟Ｘ |
|
原体「ka-lún-sún」。詞原三節朗無定着。「*Ka-nńg-sún」應該是單純个變体。「*Ka-léng-sún」照講是双原詞、「ka-lún-sún」濫「léng」。歌仔册有寫『加崙筍』『加侖筍』『加碖尊』『加冷損』『加允損』『加軟筍』、用例少少仔。拱樂社个戱文有寫『加侖損』（三潭印月）『加冷筍』（碎心・忠義・乞食、尾字詳細字形即閣探討）云云。明文堂《臺灣民謡情歌集》有寫『絞冷損』。現代流行歌有寫『加輪筍』『咬輪損』云云。《台日》寫『加忍損』。台灣網路有人寫『加冷損』『加冷筍』『加侖筍』『加輪筍』『加侖損』『加崙筍』云云。『加倫損』『加輪損』『加軟損』『加崙損』『加忍損』『加忍筍』嗎有出現一半下仔。那塊寫漢羅、「ka-lún-sún」三節朗特別適合寫做羅字。那卜借四角字、建議寫『加崙筍』（～笋）『加侖筍』（～笋）亞是『加冷筍』（～笋）。請看下脚。
L + un 个音節寫做『侖』恰省劃・恰歸氣。不閣『崙』基礎恰厚。夭第二調 s + ún 个音節借「損」字亞是「笋、筍」字來寫朗有合。總是「笋、筍」字使用基礎恰厚淡薄仔、而且「損」字丸那是 s + ńg 个音節个指定卡那。未來台灣假名那進化、凡世會使取『旬』做音符、造變体閣注調來寫 s + un 个音節。
台文在來『筍』『笋』朗有寫。現代台灣社會專寫『筍』不是因爲內部个演變、是因爲車輦教育。
《台十五》lún 有收「怕」『恐 kiaⁿ —. — 膽 táⁿ』。
|
建議
ka-lún-sún ⇄ 加崙～、加侖～
*ka-léng-sún ⇄ 加冷～
相關个詞
chheⁿ sún-sún
lâ-lûn sio... thun-lún **Bu-lun...
相關个字
崙 [lūn]
笋、筍 損 加 カ |
|
GÍ-SÛ
*sàm-mà
*sàm-bà sàm-bah |
語詞
㊟
親成漢字
ＸＸ |
|
《白話典》收『sàm-mà』。《台外典》收『sàn-mà』。「*Sàm-mà」詞原『サンマ』（秋刀魚）。嗎有人講「*sàm-bà」个欵。網路加減有人寫『散肉』。
|
建議
*sàm-mà ⇄ 産馬
相關个詞
-mà-mà
bì-lù
相關个字
散 (sàn)
産 肉 馬 |
|
GÍ-SÛ
hó͘-lān
|
語詞
虎玍
⭕
ⒸⓉ
親成漢字
虎Ｘ |
|
請看「ōe-、ūi hó͘-lān」。
|
相關个詞
ōe-, ūi hó͘-lān
lān (玍) |
|
GÍ-SÛ
kái
*kài |
語詞
介
⭕
Ⓚ
改
⭕
Ⓚ
親成漢字
㊟ |
|
「Chi̍t ji̍t saⁿ kái」云云、甲「pái」仝意思。《台日》・王育德《常彚》甲 EMBREE 朗無收。張裕宏《白話典》推論講「kái」有双詞原、一港「pái」、一港日語『回』（かい）、夭「kài」是別音。拱樂社个戱文有寫『改』（母之罪）『無下界』（母之罪）。
無的確「回」字着是「kái」个親漢字、不閣咱那寫『回』、「kái」甲在來詞「hôe」會相搶。夭「回」字着加負（phāiⁿ）一个音、袂和。建議寫假名亞是羅字。
只个語詞羅字台文一九八〇年代以後即恰汁寫个欵。現此時「kái」介成恰多人寫。不知「kài」咁是「kái」个變体。「Ē sái」甲功能詞「siáⁿ」有口語變体「siàⁿ」「ē sài」。無的確「kái」甲「kài」丸那是只種關係。
|
相關个詞
kài ("kap in kāng ~")
kái-piⁿ
相關个字
改
介 |
|
GÍ-SÛ
*phí-jū
|
語詞
㊟
親成漢字
㊟喻 |
|
打算是双原詞、父母「phì-jū」甲「pí-jū」。不閣請看「ká-sú」。《台日》《厦英》無收。《基礎語句》有介紹「phí-jū kóng」「pí-jū kóng」。傳統羅字台文有寫「phí-jū」。是講全羅《教會報》朗總 602 篇寫「phì-jū」。干礁 28 篇寫「phí-jū」、內底一九三〇年代占 14 篇。一九六〇年代有 57 篇寫「phì-jū」、干礁 2 篇寫「phí-jū」。「*Pí-jū」自頭到尾無半篇。夭 EMBREE 有收「phì-jū」「pí-jū」、無收「*phí-jū」。
|
相關个詞
phì-lūn
phì-jū pí-jū ká-sú |
|
GÍ-SÛ
tāu-sīⁿ
tāu-sī |
語詞
豆豉
⭕
～鼓
親成漢字
豆㊟荳～ |
|
主流泉語「tāu-sī」（泉方志 100、當代泉彚）。澎湖媽宮个話・鹿港語・金門語有講「tāu-sī」。《千金譜》《英厦》（455）《台日》寫『豆豉』。《雲林雜念簿》寫『豆鼓』（鼓 → 豉）。歌仔册有一半本仔寫『豆鼓』（鼓 → 豉）『豆寺』ⒸⓀ。《妙悟》*sī 有收「豉」『豆 —』甲「𢻃」『同上』。《八音》*sīⁿ 有收「豉」『豆』。請看「ìm-sīⁿ」。
「Tāu-sī」照講是原体。主流台語「tāu-sīⁿ」大概是双原詞、一港詞原「tāu-sī」、一港詞原動詞「sīⁿ」（請看）。客語講『THE̊U-SHI̊』。只个詞廣東語・吳越語・楊子江流域甲支那內地个語言朗有講（現代漢方典 1740）。「豉、𢻃」字《廣韻》是義切、『鹽豉廣雅云苦李作豉』、是「-sīⁿ、-sī」个親成漢字。
|
相關个詞
sīⁿ (豉)
ìm-sīⁿ... |
|
GÍ-SÛ
tiàu
*tiāu |
語詞
㊟
親成漢字
㊟ |
|
「Tiàu tńg khì Pak-káng」云云、《白話典》注解做『調動』（中）。中語借詞「tiàu-chit」（～職）「tiàu-khò」（～課）「tiàu-tōng」（～動）前節照講朗是只个「tiàu」。《台日》甲王育德《常彚》朗無收。《台日》是有收「調」（tiāu）『人・場所などを替へる。入替へる』。仝欵、《厦英》有收「tùi-tiāu」『TO EXCHANGE PLACES, AS PERSONS』甲「tiāu lâi tiāu khì」（仝意思）「tiāu kè lâi tiāu kè khì」（仝意思）。第三調「tiàu」照講是戰後即共中國語借个。借會條打算是因爲意思甲「tiàu chèng-jîn」彼个在來動詞「tiàu」有重叠。「Tiàu khì Lâm-iûⁿ chò peng」是用着只个「tiàu」亞是彼个「tiàu」、小可歹講。會使講台語接觸着中語了後、「tiàu chèng-jîn」彼个 tiàu 自按呢意思訓濶、加一項意思。請看「tùi-tiàu」。
「調」字（請看）本音 tiāu・tiâu、咀音 tiau、無讀 *tiàu。請讀潘科元〈調查、民調个台語音〉甲〈對鹿港泉腔「去聲」無分陰陽，再論「調、負…」第七聲（陽去）个台語音教學〉。
|
建議
*tiāu ⇄ 調
tiàu ⇄ 吊
相關个詞
tùi-tiàu
tiàu ("~ chèng-jîn") tiàu-chi̍p kòa-tiàu tiàu-oán
相關个字
調 (tiāu)
吊、弔 召 |
|
GÍ-SÛ
ta̍k-ke
*ta̍k-kē |
語詞
逐家
⭕
ⒸⒸ
親成漢字
逐家 |
|
代詞、「ta̍k-ke hó」云云。只个語詞實音「ta̍k-ke⁻」（～ta̍k-kē）、情形甲「tāi-ke」（請看）相同。台文到今寫『ta̍k-ke』、無寫『*ta̍k-kē』。請看「i」。「Ta̍k-ke」照講是双原詞、詞原「ta̍k」（逐）甲「tāi-ke」（大家）。凡世嗎會使講是「tāi-ke」个一種特別變体。請看「ta̍k ê」。
《台日》有收「ta̍k-ke」『家每に。各家』『（漳）【 大家】』。《台日》興訓用、寫『各家』。歌仔册定定寫『大家』『逐个』、卜倚不八寫『逐家』、嗎無幾篇寫『各家』。全羅《教會報》有 50 篇寫着「ta̍k-ke」、自一八八〇年代。5747 篇寫「tāi-ke」。2 篇寫「tāi-kē」。
現代唐山《漳腔典》（147、148）無收「*ta̍k-ke」、顚倒「ta̍k ê」有注解『大家』。
|
相關个詞
ta̍k (逐)
tāi-ke ta̍k ê i (伊) |
Pháiⁿ-sè, “JĪ” chit pêng chhōe bô... “GÍ-SÛ” hit pêng kán-ná ū liāu ŏ͘!
歹世、「字」只平尋無。「語詞」彼平簡那有料嗚！
歹世、「字」只平尋無。「語詞」彼平簡那有料嗚！